بعد لما عرفنا يعني إيه إن قدرة العربية ديه 100 حصان!!!
تعالا نتعرف مع بعض علي حاجة جديدة!
أنا ليه بحط صندوق التروس في العربية!؟؟
علشان أحصل علي عدة نسب تخفيض من السرعة والعزم!!
سرعة؟! عزم؟! أيه يا عم الكلام الكبير ده!
أستني بس لهو أنا مقولتلكش؟! يقطعني!
القدرة = السرعة * العزم!!!
يعني العربية لو قدرتها 100 حصان ممكن تبقي 50*2 ، أو 25*4!
طيب بحدد الحاجات ديه علي أساس إيه؟!؟
أقولك أنا يا سيدي!
أولاً في بداية الحركة بحتاج عزم عالي جداً جداً! علشان أتغلب علي الأحتكاك!
وبعدين العزم بيقل وبزود قدامه السرعة!
"ببساطة العزم اللي خارج من الموتور مستحييييييييييل يحرك العربية 1 سم واحد من مكانها!"
طب نعمل أيه؟!
بسيطة نكبر العزم! بس ده علي حساب السرعة! "علشان زي ماقولنا إن القدرة ثابتة!"
يعني لو ضربنا العزم في 5، يبقي السرعة اللي خارجة من المحرك هتتقسم علي 5!
إزاااااااااااااااي أجدددددع!!!!
بكل بساطة زي العجلة اللي كُنّا بنركبها وإحنا صغيرين!
الترس الأمامي كان كبير! كان بيتحرك لفة واحدة مقابل مثلاً 4 لفات من الترس الصغير "بكبر السرعة!"
بس يا عم إنت قولتلي عايزين نكبر العزم في السرعات الأولي علشان أتغلب علي الأحتكاك!
"شكلك فاهم يا نصة!"
بسيطة يا عم، يبقي الغيار الأول هاعمل الترس اللي بيتحرك صغير! واللي بيحركه "كبير!!!!!"
أتفضل بقي بص علي الصورة دلوقتي! ده الفتيس المانيول!!
الترس الأخضر ده اللي جاي من محرك العربية!!
معشق في الترس الأحمر اللي تحته اللي بدوره بيدور ال"layshaft" اللي قدامك. وال"layshaft" ده بيدور باقي التروس كلها.
وزي مانت شايف التروس في حالة تعشيق طول الوقت.
طب إيه اللي بيحدد إيه نسبة التخفيض اللي هاستعملها واللي هتوصل لألات الجر؟؟؟؟
حاجة إسمها ال"synchronizer" واللي لونها بنفسجي ديه! واللي بتاخد حركتها من عصا الفتيس.
بالبلدي إسمها "الغوايش" علشان الأسطي جمعة ميفتكرش إننا نايمين علي ودانا!
وزي مانت شايف كل غيارين بيبقي ليهم "غويشة" واحدة. يعني الأول والتاني غير التالت والرابع!
يبقي تلقائي لو عندك مشكلة في الغيار الأول والثاني بس؟!
العيب في الغوايش يا كبير!!! عايزيك تروح بقلب جامد للأسطي جمعة وتقوله!
أنا عايز طقم غوايش!!!!!
طيب لما بحرك ال"synchronizer" ده علي الغيار الأول بأستخدام عصا الفتيس!
الترس بيعشق مع الغيار الأول بإستخدام السنون اللي في الغويشة، وبيحرك ال"output shaft" اللي فوق ده! اللي بيطلع العزم والسرعة المطلوبة!!!
وزي مأنت شايف! كل غيار بيبقي ليه نسبة تخفيض مختلفة!
لحد لما بوصل في الغيار الخامس لنسبة تخفيض تقريباً 1:1
الموضوع بسيط وسهل!
وده الفتيس المانيول، حاولت أبسطه علي قد لما أقدر! اللي عنده سؤال يتفضل. واللي مش عنده يبقي ورقة صغيرة وأسمك فوق! "كويز أستايل"
ليست هناك تعليقات:
إرسال تعليق